A vitoria (da CIG) ten 100 pais, e a derrota é orfa!

A CIG gañou no seu día, no Tribunal Superior de Xustiza de Galiza, o conflito colectivo contra o BBVA por non respectar os horarios especiais do Nadal. Foi a CIG a que obriga á Dirección a respectar o noso dereito.

Disfrutaremos o dereito ao horario reducido nos días sinalados do Nadal. Pero non foi a Dirección por iniciativa propia, tal e como deixou entrever no seu comunicado interno. Nin foi «outro éxito» dos vendedores de fume de CC.OO, sindicato ao que solicitamos unha rectificación sen ter contestación.

Foi a CIG quen ante o recorte, interpuxo demanda no TSXG fai 2 anos. O banco non aceptou repoñer o dereito, polo que se celebrou o xuízo, ditando a xustiza sentenza favorable ao cadro de persoal. Polo tanto non estamos ante unha cesión da magnánima Dirección.

Naquel xuízo estaban citados como parte o resto de sindicatos, incluída CC.OO que non compareceu. É dicir, pasaron olimpicamente de posicionarse a favor da demanda da CIG que garantiu o dereito.

Ao Cesar o que é do Cesar, o horario do Nadal é un éxito da CIG.
As ampliacións dos horarios, os horarios flexibles, o rexistro fake ou a extensión ilegal da xornada si que son éxitos do banco e derrotas laborais avaladas polos seus sindicatos satélites.

Sentenza do TSXG: Horario reducido nos días 24 e 31 de decembro

Como informamos en xaneiro, o TSXG deu a razón á CIG no conflito colectivo presentado contra a decisión do BBVA de suprimir o horario reducido dos días 24 e 31 de decembro.

Podedes consultar a sentenza na web do Poder Xudicial: i.gal/NadalBBVA

O tribunal galego declara nula a modificación substancial e repón o persoal que realiza a súa xornada de 8 a 15 horas (horario máis habitual en oficinas de rede) no seu dereito a gozar do horario reducido como se viña facendo anteriormente.

O BBVA presentou recurso de casación perante o TS, mais as sentenzas de conflito colectivo son executivas desde que se ditan, con independencia do recurso (art. 303 da Lei da Xurisdición Social).

Animámosvos a exercer o voso dereito e aproveitar o horario reducido dos vindeiros días 24 e o 31 de decembro para confraternizarmos entre compañeiras e compañeiros, tomarmos forzas para o novo ano e brindarmos por un futuro de novas conquistas laborais.

Boas festas!

A xustiza dános a razón: Gañamos a Mr. Scrooge e recuperaremos o horario especial do Nadal

No ano 2019 o BBVA decidiu eliminar o horario especial do Nadal dos días 24 e 31 de decembro e do 5 de xaneiro.

Daquelas presentamos Conflito Colectivo. Despois de alongar o proceso e á espera de sentenza o BBVA denegou o dereito tamén no ano 2020.

A CIG, coma sempre, non deu por bo un recorte dos nosos dereitos, e instamos dende os comités de empresa ao cumprimento dos horarios especiais nas catro provincias galegas. No Conficto Colectivo que representamos contra o BBVA, incluímos a todos os sindicatos coa presenza no banco en Galiza e só CGT sumouse a nosa demanda; CC.OO–UGT–ACB pasaron de presentarse (así defende os vosos dereitos).

Canto che debe o BBVA?

Escoitaches falar da xente que asina nóminas e cobra menos? A ti pásache algo semellante. A maior parte do persoal de Banca está sufrindo ese tipo de prácticas cando realiza horas extraordinarias que non son pagadas, nin compensadas con libranza.

Como BBVA non as paga, moita xente non sabe o que lle corresponde e xa se sabe «ollos que non ven…»

Custe estatístico horas extras e importe a cobrar MENSUAL
segundo horas extras realizadas á semana (en euros)

Salario Anual	Custe hora extra	2 h. semanais	3 h. semanais	5 h. semanais
25.000 €	14,70	118	176	294
30.000 €	17,64	141	212	353
35.000 €	20,60	165	247	412
40.000 €	23,53	188	282	471
50.000 €	29,40	235	353	588

Até o anterior convenio as horas extras tiñan un recargo do 75 %; bota contas do que significou este recorte. Como a CIG xa tiña en marcha a campaña polo Rexistro de Xornada, por se acaso, os bancos se blindaron.

Ademais, as nosas horas extras non pagadas permiten ao BBVA continuar coa reducición persoal, poñendo en perigo os postos de traballo, tamén o teu. Para evitalo as horas extras están limitadas por Lei a un máximo de 80 horas anuais, un límite que o banco se salta pola falta de rexistro.

Eleccións sindicais: as nosas propostas

O vindeiro 13 de febreiro as traballadoras e os traballadores do BBVA temos a oportunidade de elixir as persoas que nos van a representar nos próximos catro anos, e pedimos o teu apoio nas urnas para seguir traballando na defensa dos dereitos de todos e todas nós. Velaquí a nosa folla de ruta:

Estabilidade no emprego e condicións xustas de traballo:

Loitamos contra o peche de oficinas e a amortización de postos de traballo, denunciando a destrución de postos estruturais. Defendemos unha formación de calidade, presencial e dentro da xornada.

Igualdade:

A conciliación e a promoción paritaria son cuestións irrenunciables. Reclamamos un Plan de Igualdade que recolla as demandas do persoal. 8 de Marzo e 25 de Novembro son datas senlleiras, pero a nosa loita é todo o ano. Somos un sindicato feminista.

Xornada regulada:

Loitamos contra as horas extras nas rúas e nos xulgados. A conciliación real pasa por rematar coas prolongacións de xornada e as reunións fóra de hora.

Saúde e seguridade

Demandamos a correcta avaliación e posterior erradicación dos riscos psicosociais. No CESS trasladamos a situación real e promovemos iniciativas concretas. Vixiamos o estado da seguridade nos centros de traballo, actuando con inmediatez ante situacións de risco.

Contra a sobrecarga de traballos e as presións:

Esiximos unha dotación axeitada de persoal e o fin das presións e da arbitrariedade dos procesos de avaliación; e loitamos contra os «semáforos» e «pool de baixo desempeño», tamén ante a xustiza.

Somos a voz sindical próxima:

Traballamos ao teu carón nas oficinas e vivimos a realidade do día a día. Trasladamos as reivindicacións do persoal á Xunta Xeral de Accionistas, e nos nosos comunicados. Somos un modelo sindical participativo e asembleario no que contamos todos e todas!

O noso único interes é o teu, e por iso esperamos conseguir unha posición forte de cara á próxima negociación do Convenio, do Plan de Igualdade e de todos os retos que están por vir.

A Xustiza Europea avanza na obriga do rexistro da xornada

O Avogado Xeral do Tribunal de Xustiza da Unión Europea (TXUE), propón que o Tribunal declare que a carta e a Directiva 2003/88, impoñen ás empresas a obriga de implantar un rexistro de xornada. A CIG, como parte interesada no Conflito Colectivo contra o Deustche Bank, agarda que esteamos na antesala dunha sentenza da xustiza europea que deixe novamente en evidencia sentenzas do Tribunal Supremo favorables á banca.

 


    Mobilización da CIG contra o fraude das horas extras.
    Imaxe: CIG (cc) BY-NC-SA
 

Xuízo na Audiencia Nacional pola demanda da CIG de rexistro horario e horas extras.Haberá negociación

O 20 de abril celebrouse a vista pola demanda presentada pola CIG contra o BBVA, para que proceda á implantación dun sistema de rexistro da xornada real efectiva que realiza o persoal e, polo tanto, das horas extraordinarias.

Presentada na Audiencia Nacional a demanda para que o BBVA rexistre a xornada e as horas extras

Xa está presentada na Audiencia Nacional a demanda da CIG contra o BBVA, co obxectivo de establecer un sistema de rexistro da xornada efectiva e, polo tanto, das horas extraordinarias.

O conflito colectivo presentado xa foi admitido, estando á espera de que se fixe data para o xuízo.

A semana pasada, a mesma Audiencia Nacional ditou unha sentenza, por un conflito idéntico, favorable a unha demanda da CIG contra Abanca, e recoñece que tiñamos razón en todos e cada un dos puntos demandados:

Manter o emprego: Con cláusula de EREs ou con medidas de reparto do traballo e contención dos obxectivos?

Na reunión do 22 de febreiro todo quedou no aire. Haberá nova reunión o 26, na que pode que «prorroguen» de novo a ultraactividade, pensamos que a expensas do que suceda no Convenio de Aforro (se alá se implanta a xornada partida, xa veremos aquí).

Malia ser unha reunión de trámite, para a nosa sorpresa un sindicato expuxo na mesa a preocupación polo impacto sobre o emprego que terá a dixitalización bancaria. Ante isto, defenderon que a cláusula do Convenio que regula os ERE's pase de ser unha disposición adicional temporal (co gallo da crise), a formar parte do corpo normativo e, polo tanto, de carácter indefinido. Consolidaría os ERE's nos bancos cando a nivel político fálase da derrogación das reformas laborais que os facilitan.

Para a CIG as únicas medidas para garantir o emprego son o reparto do traballo a través da redución de xornada implantando as 35 horas, rexistrar o horario como estamos demandando xudicialmente, acabando ademais coas horas extras e revisar de xeito pactado como se asignan os obxectivos comerciais. De aí que, ante os procesos que se aveciñan, a nosa plataforma xa recollese medidas nese senso.

O cinismo ilustrado

No proceso de abono da nómina deste mes, imos ver de novo materializada a inxustiza dun sistema de retribución variable que está feito a medida para asegurar que algunhas persoas cobren, e moito, e outras o teñan moi, moi difícil. «Casualmente» cada vez menos persoas cobran, canto máis abaixo nos situamos na pirámide das categorías profesionais. Sorprende moito ver cantos DOR individuais non chegan aos mínimos cando o DOR da oficina e cara arriba, chegan claramente.

Pravda: A VERDADE

Conflito Colectivo horario:
Nós defendemos ao persoal do BBVA, outros deberían explicar porqué non o fixeron.

Somos conscientes de que para o BBVA resulta máis barato pagar as sancións das Inspeccións de Traballo pola realización de horas extraordinarias, que pagar as horas. Por iso a CIG decidiu presentar unha demanda de Conflito Colectivo na Audiencia Nacional contra o banco.

Na demanda incluímos como parte o resto de sindicatos: CC.OO, UGT, ELA, LAB, CGT, ACB e Intersindical-CSC, para que se queren podan sumarse e achegar o que estimen oportuno.

Non entendemos que outros sindicatos carguen contra a CIG por presentar a demanda contra o BBVA. CC.OO e CGT deberían dar explicacións: Por que presentaron denuncia contra outras Entidades, pero non contra o BBVA? Cal foi o motivo? Que culpa ten a CIG?

As demandas da CIG esixindo un control horario alteran o guión preconcebido da negociación

Na última reunión da mesa negociadora, onde xa hai un preacordo entre a AEB—CC.OO—UGT para recortar dereitos, as demandas presentadas pola CIG en varias entidades para que se rexistre a xornada laboral efectiva e as horas extras, entraron na negociación.

AEB aposta por unha negociación para chegar a un acordo estatal paralelo ao convenio, con todos os sindicatos demandantes, incluíndo os que non están na mesa negociadora. Nesa nova negociación tamén estarían CC.OO e UGT, malia que non presentaron demandas.

CC.OO e UGT, que nada fixeron a este respecto na banca privada, malia ser un dos maiores problemas no sector, din agora que o acordo debería incluírse no convenio.

Sabes canto che furta a empresa? Nós si, por iso a demandamos na Audiencia Nacional

Escoitaches falar da xente que asina nóminas de 1.000 euros e cobra 500? A ti pásache algo semellante. A maior parte do persoal do BBVA está sufrindo ese tipo de prácticas cando realiza horas extraordinarias que non son pagadas, nin compensadas con libranza.

Hai xente que pensa que está por riba do Convenio Colectivo grazas aos complementos «voluntarios», pero realiza horas extras sen control e máis alá do límite legal. Compensa o que pagan? Estás por riba do convenio? É doado de calcular.

Custe estatístico horas extras e importe a cobrar MENSUAL
segundo horas extras realizadas á semana (en euros)

Salario Anual	Custe hora extra	2 h. semanais	3 h. semanais	5 h. semanais
20.000 €	20,59	164,72	247,08	411,80
25.000 €	25,73	205,84	308,76	514,60
30.000 €	30,88	247,04	370,56	617,60
35.000 €	36,03	288,24	432,36	720,60

Horas extras: O 29 de decembro citáronnos no SIMA en Madrid co banco

Tal e como anunciamos, presentamos unha demanda para que o BBVA rexistre a xornada efectiva diaria de cada traballador e de cada traballadora, e para que rexistre as horas extraordinarias.
O 29 de decembro as partes estamos citadas no Servizo Interconfederal de Mediación e Arbitraxe en Madrid.

Horas extras Á Audiencia Nacional polo fin da fraude

Hoxe a CIG presentou demanda de Conflito Colectivo contra o BBVA, na que reclamamos a implantación dun rexistro da xornada efectiva que realiza o persoal e, por conseguinte, rematar coa impunidade na fraude das horas extras que deberían ser comunicadas á representación sindical. Non temos nada que perder e moito por gañar, a propia Audiencia Nacional acaba de ditar sentenza (relativa a outra entidade financeira) deixando claro o dereito a que se rexistre a xornada efectiva e a comunicación das horas extras.

8 de marzo: traballo digno, salario xusto

O vindeiro domingo 8 de marzo, a CIG participará como organización convocante, xunto con outras organizacións que forman parte do movemento feminista galego, nunha mobilización UNITARIA que sairá ás 12 h. da Estación de tren de Compostela. Facemos un chamamento á vosa participación activa na mesma.

A Secretaría das Mulleres da CIG levará faixa propia co lema da campaña do 8 de marzo «Salario xusto. Traballo digno» campaña coa que pretendemos facer unha chamada de atención sobre cal é a realidade laboral das mulleres galegas, que fica abranguida entre a emigración, o paro e o infraemprego.

Manifesto aos traballadores e traballadoras do sector financeiro

Obxección de conciencia ante Desafiuzamentos, Comercialización de produtos complexos e Quita ás preferentes e subordinadas.

A actuación das Entidades Financeiras está sendo cuestionada cada vez máis, e con máis razón, pola sociedade. Cada vez un maior número de sentenzas cuestiona a lexislación bancaria, así como o comportamento da Banca. As persoas que traballamos nelas, que non somos banqueiros, estamos na diana, é preciso un cambio profundo que debe comezar por nós mesmos.

A CIG tense dirixido ás patronais de banca (AEB) e das antigas caixas (ACARL), así coma ao FROB (a través do que se instrumenta a propiedade estatal das Entidades intervidas), para requirirlle que recoñeza o dereito á obxección de conciencia dos traballadores e traballadoras do sector ante cuestións concretas, tal e como ten establecido incluso o Tribunal Constitucional.

Reclamamos o recoñecemento do dereito a exercer a obxección de conciencia ante: