Folga na Banca, o 11N Sóbrannos os Motivos

Quen traballamos nun banco sabemos ben que sobran os motivos para secundarmos a FOLGA XERAL deste mércores 11 de NOVEMBRO.

Ninguén mellor que nós coñece a situación laboral que padecemos: mentres os bancos acadan beneficios históricos e reparten suculentos dividendos, as traballadoras e os traballadores –artífices da xeración deses beneficios– seguimos perdendo poder adquisitivo (cada vez nos custa máis chegar a fin de mes). O acoso comercial implantado como forma de xestión, a sobrecarga de traballo convertida en rutina, os malos modos, os requirimentos constantes de cumprimento de obxectivos…

Os bancos continúan desvalorizando o noso traballo como estratexia, nunca dámos o suficiente, nunca cumprimos o suficiente… nunha política de humillación e maltrato cotián, para que sintamos/pensemos que «non valemos» para este traballo.

Mais agora chegou o momento de amosarlles que as traballadoras e os traballadores da banca tamén temos dignidade, que nos merecemos infinitamente máis do que recibimos e que somos moito máis que monicreques ao servizo dos que cobran cuantiosos bonus. Que non nos resignamos a continuar nesta situación e que imos loitar decididamente para cambiala.

O momento é agora. Pola dignidade das nosas condicións laborais. Pola dignidade das nosas vidas. Este mércores secundemos a Folga Xeral e participemos nas mobilizacións convocadas. De nós depende.

Fronte a arbitrariedade e a opacidade, O banco ten que dar explicacións

Nos últimos días estamos a asistir cunha fonda preocupación ao resultado da proliferación de controis, «catas» e á apertura de expedientes disciplinarios, relacionados coa implantación do novo protocolo de escoitas na Zona Contigo. Desde a CIG témolo moi claro: sempre imos defender o traballo ben feito, mais as formas e a transparencia importan tanto como o fondo. E isto semella unha cacería.

Beneficios históricos e nós perdendo poder adquisitivo!

Ante a publicación dos resultados, entendemos a alegría de accionistas e da alta dirección que cobrará abondosos incentivos. O descontento que causa na clientela ese tipo de anuncios a bombo e pratos sufrímolo nas oficinas.

Quen suamos a camiseta estamos perdendo poder adquisitivo xa que o convenio non contempla clásula de revisión salarial anual, nin melloras para este ano. O convenio da recuperación, que vendían algún, que asinaron novos recortes e que agira prometen futuras subas.

Dende a CIG dirixímonos ao banco para reclamar una negociación con toda a representación sindical, sen ter aínda resposta.

Así que toca protestar, que quen non chora non mama.

As prexubilacións e as xubilacións deféndense!

No banco e goberne quen goberne

Como xa sabedes levamos anos reclamando ao BBVA un Plan de Prexubilacións negociado, de igual xeito que existe noutros bancos. Seguimos defendendo que hai aproveitar os períodos transitorios abertos na reforma da Seguridade Social.

As prexubilacións sempre estiveron ligadas á posibilidade do persoal de xubilarse anticipadamente (antes aos 61, agora aos 63 transitoriamente), por iso calquera cambio afecta aos procesos de prexubilación.

A reforma de 2011, pactada polo PSOE–CEOE–CC.OO–UGT, alongou a vida laboral até os 67 e estableceu durísimos coeficientes redutores, elevando a idade de xubilación anticipada aos 63. Isto levou a que se restrinxiran tremendamente os procesos de prexubilación. Unhas saídas brandas que nós defendemos xa que permitían atenuar os procesos dos ERES. A CIG convocou unha Folga Xeral contra aquela reforma.

Neste 2026 o Goberno do PSOE e SUMAR tramita un RD que establecería un maior control sobre as saídas de persoal maior de 50 anos.

PP e Vox anuncian cambios no sistema público de pensións, a priori anuncian que non afectará aos xubilados e xubiladas actuais, deixando entrever que afectará a quen se xubile no futuro. Se miramos ao noso entorno, na UE outros Gobernos están alongando a vida laboral até os 70 anos e penalizando aínda máis as xubilacións anticipadas.

Seguimos defendendo a posta en marcha dun proceso de prexubilacións no BBVA, aproveitando as actuais condicións transitorias, con garantías ante posibles cambios. Unhas prexubilacións que permitirían un máis que necesario relevo xeracional. O tempo corre na nosa contra.

Inflación desbocada!

BBVA pode permitirse negociar para evitarnos novo recorte salarial

O IPC pechou en setembro no 5,5 % a nivel galego, e no 4,9 % a nivel estatal.

• A suba do salario base do convenio é só do 2,75 % (de outros conceptos como a antigüidade, é aínda menor, do 2 %). De seguir así o IPC non recibiremos atrasos, nin se actualizarán táboas.
• Malia ter beneficios históricos, o BBVA non contempla ningunha suba adicional en 2026.
• A compensación por quilometraxe leva conxelada desde 2012. O diésel subiu en setembro un 34 % e a gasolina un 28 %. 
• As comidas, nas xornadas partidas, están en 11 € ∕día.
• A suba brutal dos alugueres e do prezo da vivenda, que non contempla o IPC, está dificultando especialmente a vida do persoal máis novo que ten salarios máis baixos.

A falta dunha cláusula de revisión salarial no Convenio, foi un dos principais motivos polo que a CIG non o asinou.