BBVA, intelixencia artificial e idiomas cooficiais

Neste momento no que o mundo laboral se transforma a pasos axigantados, os sindicatos que subscribimos este comunicado sabemos da intención do BBVA de seguir introducindo a intelixencia artificial en todos os seus procesos, tamén nos referentes á selección de persoal.

Non podemos obviar a realidade á que nos enfrontamos desde que se desmantelou o anterior organigrama e modelo de TyC: nas últimas contratacións, as linguas cooficiais, euskera, galego e catalán, quedaron relegadas a un segundo plano. Esta omisión non é só un erro administrativo, senón unha falta de respecto cara á nosa identidade e ás nosas comunidades. En Euskal Herria, Galiza e Catalunya, isto tivo consecuencias tanxibles: o coñecemento dos nosos idiomas converteuse nun requisito invisible.

A desconexión coa sociedade na que vivimos e operamos é palpable. En localidades onde as nosas linguas son o zume que nutre a comunicación cotián, afástanos da realidade. Pero esta perda de conexión vai máis alá do cultural; tamén repercute no noso negocio. Mentres BBVA se afasta, competidores como Kutxabank, Abanca, Caixabank, Banco Sabadell, Caja Laboral ou Caixa Rural cóidano ao detalle e están coméndonos cota de mercado. Realmente queremos seguir o camiño que o Banco Santander xa recorreu e perder a nosa relevancia nos nosos territorios?

Intervención da CIG Xunta Extraordinaria 2024

Deseguido, a intervención completa na pasada Xunta xeral extraordinaria de accionistas do BBVA · 2024

Dende o pasado abril, 6 manifestacións e 99 concentracións para reclamar a suba salarial

Xornada de loita en Pontevedra.

Para un salario medio (45.000 €) a perda anual (pola non actualización co IPC dos anos 2021—2022) é de 4.770 €. Os atrasos acumulados que non cobraremos son 9.540 euros de media. Unha vez que os bancos asociados á AEB están aboando a «suba adicional 2023», vemos coma en moitos casos está no 2 % (xa que non se actualiza a antigüidade). Por iso a CIG segue reclamando que se soben os prezos, teñen que subir os salarios

Manifestación en Lugo o 23 de xuño e concentracións diante de 20 oficinas

Se queremos revisión salarial, hai que moverse

As delegadas e delegados da CIG–Banca percorremos as rúas de Lugo en manifestación concentrándonos diante das sucursais para demandar unha revisión salarial xusta e para protestar contra a presión comercial.

Tal e como está acontecendo noutros sectores, as patronais resístense a actualizar os salarios, incrementándose a conflitividade.

Manifestación por Ourense e concentracións diante das sucursais bancarias

Nova xornada reivindicativa da CIG–Banca

Ourense foi o escenario dunha nova xornada de loita pola recuperación salarial e contra a presión comercial e a suba dos obxectivos. Estes días coñeceuse que as altas direccións subíronse os bonus un 29 %, ao tempo que o IPC a nivel galego pechou nun 9,1 %. 

A CIG–Banca saíu á rúa para demandar unha suba salarial digna, rexeitando os recortes dos Convenios estatais.

Mentres as altas direccións subíronse a retribución variable un 29 %, e o IPC a nivel galego pechou no 9,1 % o mes pasado, AEB e CECA manteñen a conxelación salarial.

Manifestación pola Coruña con numerosas concentracións diante das sucursais bancarias

Intensa xornada reivindicativa da CIG–Banca

O pasado 28 de abril, delegadas e delegados da CIG nos comités dos distintos bancos, mobilizáronse para reclamar que se actualicen os salarios, percorrendo durante máis de 3 horas as rúas de A Coruña, con concentracións en 20 sucursais de distintas entidades que se atopaban no percorrido, rematando na Delegación do Goberno, para protestar contra o Real Decreto da Autoridade de Defensa da Clientela.

A CIG–Banca saíu á rúa para demandar unha SUBA SALARIAL DIGNA, rexeitando os recortes dos Convenios Estatais e protestar contra o incremento brutal dos obxectivos e da presión comercial.

Os ánimos estaban quentes e as consignas «Se soben os prezos, teñen que subir os salarios» ou «A presión comercial é acoso laboral», resoaron permanentemente polas rúas da Coruña.

A manifestación partiu ás 11 da mañá da rúa Juan Flórez, con concentracións nas oficinas do BBVA, Abanca, B. Santander, B. Sabadell, Bankinter e Caixabank, ata os Cantóns, para rematar na Delegación do Goberno, onde se protestou polo Real Decreto de creación da «Autoridade de defensa dos clientes financeiros», que fai Lei o modelo antisocial posto en marcha polas direccións dos bancos. Non regula o dereito da clientela a ser atendida presencialmente, nin pon freo ás abusivas comisións; tampouco regula tempos máximos de espera nas colas; pero ademais de dar corpo de lei á reconversión que afecta aos postos de traballo, pode dar lugar a sancións aos bancarios e bancarias.

Porqué ten sentido a FOLGA o 26, e NON o ÚLTIMO día

A folga é unha medida de defensa que ten a clase traballadora, non é un fin en si mesma. A folga ten éxito se ten participación do persoal, pero tamén se hai tempo para «xestionala», para que ao día seguinte os sindicatos teñamos marxe para negociar, ou se é necesario poder incrementar o conflito.

Metela o último día fai que, aínda que fose un éxito, ao día seguinte, xa esgotado o prazo legal para negociar, non valga para nada, que quede nunha simple «pataleta».

Nós defendemos dende o primeiro momento a Unidade de Acción e compartimos o cabreo do cadro de persoal ante o triunfo da Dirección, que foi quen de dividir ao cadro de persoal para vencernos. Pero realmente hai unha folga: a do 26 de maio; a outra non existe máis que no papel.

Unha proposición indecente da Xunta de Galicia: incentivar con subvencións os peches e os despedimentos

En plena conflitividade laboral, motivada polos Expedientes de Despedimentos Colectivos derivados do proceso de reconversión do sector bancario, a Xunta de Galicia presentou un proxecto de Orde para subvencionar con diñeiro público caixeiros automáticos e axentes financeiros, incentivando os peches de oficinas e polo tanto os despedimentos.

O sector de banca está en pleno proceso de reestruturación, o BBVA e Caixabank teñen proposto ERE’s que afectan directamente a 12.100 persoas; o Santander está aplicando un ERE que contempla o despedimento de 3.672 persoas e a subcontratación de 1.100. E os compañeiros e compañeiras dos bancos afectados están en pleno proceso de mobilizacións para defender os postos de traballo.

Malia este escenario, a Xunta de Galicia ten un proxecto de Orde para incentivar o peche de oficinas e os despedimentos, subvencionando os caixeiros automáticos e a contratación de axentes financeiros nos concellos nos que os bancos pecharon as oficinas. Unha proposta indecente, que xustificará a transferencia de máis recursos públicos para o banco responsable de deixar sen servizos financeiros á poboación.

Uns menten e outros non se decatan Acordo Contigo:

Máis do 60 % poderán traballar polas tardes

Con extrema rapidez, o pasado día 8, na segunda xuntanza da mesa negociadora, asinouse o Acordo colectivo que regula as condicións para BBVA Contigo unha vez que o banco presentou a súa proposta. Non está na liña do asinado por CC.OO–UGT–ACB para xornadas partidas noutras entidades; este é o peor acordo do sector (haberá que preguntarlles porque asinaron outros mellores en entidades como Santander ou Caixabank).

Rexeitamos un acordo que permitirá obrigar a traballar polas tardes a máis do 60 % do cadro de persoal, toda vez que o 25 % do que falan non substitúe, senón que se engade aos horarios especiais vixentes. Mágoa non atopar apoio á nosa proposta, na que defendiamos a medición da carga de traballo para que poida ser cumprida dentro da xornada laboral, e non hai sistemas de control. Polo que ese acordo, ao igual que outros, asine quen os asine, xa foi feito para ser incumprido. Supón poder incorporar a Contigo e, polo tanto, pasar de xornada continuada a xornada partida, a máis de 5.000 persoas, superando o límite actual do 5 % do persoal a un 25 % só para ese colectivo.

Onde quedaron as liñas vermellas tan anunciadas polos asinantes de non superar o 10 % do cadro de persoal?
Só iso xa suporía duplicar de súpeto o número de persoas de Contigo con xornada partida. E aceptaron quintuplicalo.
Onde foron as súas elocuentes reivindicacións dos 3 meses de xornada continuada de «verán», do complemento salarial (incremento bruto de 64,90 € /mes non pensionable)…?

Incluso teñen a ousadía de «vender» como melloras aspectos que non o son, e dereitos xa existentes. Na carreira profesional (sen efectos retroactivos, aínda máis inxusto para quen xa está no colectivo) as e os Xestores de Banca Persoal e PAES son forzas de venta especializada con Nivel 8 xa como mínimo, a voluntariedade e o desestimento (incluso empeorándoo, pasando dun prazo de 1 a 3 meses), a axuda alimentar, o horario da Semana de Festa Maior (por convenio colectivo)…

No caso dos e das Xestoras Comerciais consolidarán o Nivel 8 cando leven 4 anos en Contigo (sen retroactividade) e só se teñen xa o Nivel 9. Poderán pasar até 16 anos (4 deles en Contigo) até acadar o Nivel 8.

Mais como o acordo é «moi bo» segundo os asinantes, non temos ningunha dúbida de que as primeiras en solicitar a incorporación ao Contigo serán as persoas integrantes da representación sindical e a afiliación deses sindicatos que agora teñen a xornada xeral continuada.

Atención: o banco quere aproveitar a negociación Contigo para acabar co horario continuado

Na reunión que se mantivo o día 20 de setembro de inicio da negociación do Colectivo Contigo, sorprendeunos a falta de concreción da proposta do Banco, que non entregou ningún documento por escrito sobre cales son as súas intencións.
O que si que está claro é que a aceptación do Banco a negociar o tema dos Contigo responde ao feito que está en falso no que se refire aos límites acordados da porcentaxe do cadro de persoal que pode facer horario partido (actualmente estipulado nun 5 %) e que claramente sobrepasa.

Que intencións ocultas ten o Banco?

O Banco aceptaría algunhas melloras sobre as condicións do Colectivo, pequenos logros sen grandes pretensións, pero a cambio pretende eliminar os límites actuais acordados de persoal con horario partido e deixalo aberto á voluntariedade (?). Sen unha limitación pactada, poñemos en risco a xornada continuada do resto do persoal amparado actualmente polo propio Convenio.

Non somos cómplices da fraude: denunciámola!!!

O 9 de maio a AEB, alegando a sentenza de Bankia, fixo unha proposta que non contempla rexistrar a xornada; queremos lembrar que o BBVA ten esa obriga, despois do conflito colectivo presentado exclusivamente pola CIG.

 


Concentración da CIG diante do BBVA na Coruña (8/5/17) Imaxe: CIG (cc) BY-NC-SA
 

Convenio: Os sindicatos debemos dar a cara contra a patronal

Imaxes: CIG · (cc) BY-NC-ND Concentración 13/11/15  

O que vivimos día a día nos postos de traballo é inxusto, coma inxusto é que aínda por riba, as Direccións pretendan recortarnos salarios. Pagar menos por máis traballo. As cousas non cambiarán por si soas, é preciso contestar cada golpe, denunciar cada abuso, combater cada recorte. Dentro do banco mandan eles, pero a rúa é nosa e por iso, o pasado 13 de novembro saímos de novo á rúa.

Manifestación en Vigo con concentracións en Caixabank, BBVA, Abanca, Pastor‐ Popular, Santander e Sabadell

 Imaxes: CIG · (cc) BY-NC-ND Concentración 21/10/15  ^{[.jpg · 10'3 MB]}

Tal e como anunciamos, o 21 de outubro manifestámonos polo centro da cidade de Vigo, concentrándonos en distintas entidades, dando así continuidade ao proceso de mobilizacións iniciado o 24 de setembro para demandar un CONVENIO XUSTO, e para defendernos das intencións das direccións e salvagardar os postos de traballo e as condicións laborais.

Os cadros de persoal están fartos das condicións de traballo impostas polas direccións, os abusos, as ameazas, a arbitrariedade, os obxectivos crecentes, etc. Mentres as direccións son as únicas cómodas coa situación actual: disfrutan cada día de maiores privilexios a costa de recortar os nosos dereitos.

En Madrid a AEB consegue cesións a cambio de nada e en Galiza seguimos coas mobilizacións

A día de hoxe non hai novas propostas patronais, nin os bancos mudaron a súa posición. Só quen está disposto a ceder dereitos sen opoñer resistencia, pode valorar como positiva a negociación.

A AEB mantén todas e cada unha das súas propostas, non as retirou. Pero ademais, a situación que vivimos día a día nas empresas, os problemas aos que debería dar resposta o Convenio, non variaron (presións para a colocación de produtos, obxectivos crecentes, cargas de traballo inasumibeis que obrigan a estender a xornada, etc). E malia isto e para a nosa sorpresa, houbo sindicatos que se felicitaron pola «marcha da negociación» e se amosaron dispostos a ceder en materias clave (condicións para novas contratacións, recálculo pagas de beneficios).

Mentres, a patronal ten uns obxectivos claros e fala de cousas serias (recortar salarios, recortar dereitos), hai quen tira de ocorrencias, por exemplo pretende que a patronal inclúa no Convenio unha cláusula de «honestidade dos bancarios e bancarias». Dende cando quen nos obrigan a vender produtos que a clientela non demanda, quen deseñan e implantan cláusulas declaradas ilegais, son quen teñen a potestade de darnos o título de honorabilidade?