CIG BBVA: Intervención da CIG Xunta Extraordinaria 2024

Quenda de intervencións Xunta Xeral Extraordinaria de Accionistas 2024

Deseguido, a intervención completa na pasada Xunta xeral extraordinaria de accionistas do BBVA · 2024

Bo día, egun on, bon día, Buen día.

Son Xosé Miguel Fernández e fálolles en nome da Confederación Intersindical Galega (CIG), sindicato maioritario no BBVA en Galiza; E no de moitos compañeiros e compañeiras que nos delegaron os seus votos nesta Xunta Extraordinaria, con indicación expresa de VOTO EN CONTRA dos dous únicos puntos da Orde do Día, en contra da ampliación de capital para a compra de Banco Sabadell.

Aínda que, previo ás xuntas de accionistas ordinarias de BBVA, xa se converteron en habituais as intensas campañas de recollida de delegacións de voto de accionistas a favor do Consello de Administración, esta ocasión levouse a palma. Levamos semanas padecendo nas oficinas unha presión brutal para que se contacte e convenza a todos os e as accionistas de BBVA para que deleguen o seu voto no Consello e así vostedes poder «colgarse a medalla» cunha porcentaxe de aprobación espectacular. Esa foi a máxima prioridade comercial nas últimas semanas, todo o demais podía agardar e, cando menos, deberían ruborizarse por iso.

Votamos en contra da ampliación de capital, porque de saír adiante a OPA hostil lanzada por vostedes sobre o Banco Sabadell, seguiríalle a fusión de ambas as entidades coas repercusións que nós —non vostedes— padeceriamos:

Pecharían oficinas e restrinxirían aínda en maior medida os servizos financeiros á clientela e ao conxunto da sociedade.
Destruirían milleiros de postos de traballo. Xa manifestaron vostedes que habería «medidas non traumáticas». A elas tamén se referiron no innecesario ERE de 2021 para despedir a 3.000 persoas (algunhas delas mesmo sen unha suposta voluntariedade) e para modificar as condicións de traballo a varios centos de compañeiras e compañeiros (ampliacións de xornadas, traslados forzosos, etc.). A quen despediron, marcharon mal, e quen quedamos, quedamos moito peor. Esas son as medidas de axuste «non traumáticas» das que falan de novo agora.
No caso dunha eventual fusión os traballadores e traballadoras que quedasen, verían incrementadas as súas carteiras de clientes e a presión comercial. Máis sobrecarga de traballo para un persoal extenuado.
A entidade resultante pagaría menos impostos, xerando créditos fiscais ao seu favor eludindo o futuro pago de imposto sobre beneficios.
A entidade resultante reduciría a súa contribución á Seguridade Social, cargando ademais sobre a caixa das pensións a reestruturación.
Reduciríase a competencia con graves consecuencias desde o punto de vista do crédito (a particulares e empresas) e da retribución do aforro. Hoxe o sistema financeiro galego xa ten un grao de concentración moi elevado (dos maiores por rexións europeas), e a nivel estatal os 3 grandes grupos bancarios (Santander, CaixaBank e BBVA) controlarían case o 70 % do mercado financeiro.

En definitiva, a quen beneficiaría esa fusión? …Á clientela non, e aos traballadores e traballadoras de BBVA e Sabadell tampouco. Os grandes beneficiados neste proceso serían os fondos de investimento especulativos estranxeiros (a maior parte estadounidenses), que son os maiores accionistas da banca española en xeral e de BBVA e Sabadell en particular.

Para finalizar, denunciamos ante este Consello de Administración a desmesurada presión comercial que se está exercendo sobre o persoal e a sobrecarga de traballo existentes.

Vostedes trasladaron ao conxunto de traballadores e traballadoras do banco a súa responsabilidade de convencer ao mercado sobre a viabilidade desta operación; e para iso non se lles ocorreu nada mellor que incrementar os obxectivos de colocación de produtos financeiros á clientela neste segundo cuadrimestre entre un 25 e un 90 %, en pleno período de vacacións estivais, o que fai aínda máis inviable alcanzalos, con persoal traballando en oficinas saturadas e con escasas contratacións de apoio. Irremediablemente, esta situación tradúcese nun aumento importante das baixas por enfermidade.

Para vostedes o fin xustifica os medios. Para continuar aumentando os ata o de agora históricos beneficios e a retribución a eses fondos de investimento especulativos estranxeiros aos que tan ben serven, poñen en risco a saúde do persoal.

Moitas grazas pola súa atención.

Ligazóns relacionadas:

Vídeo: YouTube Intervención da CIG e resposta de Carlos Torres ❑ Audio [ES/GL] da intervención da CIG en Telegram ^{[.aac · 4,5 MB]}