CIG BBVA: Porqué ten sentido a FOLGA o 26, e NON o ÚLTIMO día

A folga é unha medida de defensa que ten a clase traballadora, non é un fin en si mesma. A folga ten éxito se ten participación do persoal, pero tamén se hai tempo para «xestionala», para que ao día seguinte os sindicatos teñamos marxe para negociar, ou se é necesario poder incrementar o conflito.

Metela o último día fai que, aínda que fose un éxito, ao día seguinte, xa esgotado o prazo legal para negociar, non valga para nada, que quede nunha simple «pataleta».

Nós defendemos dende o primeiro momento a Unidade de Acción e compartimos o cabreo do cadro de persoal ante o triunfo da Dirección, que foi quen de dividir ao cadro de persoal para vencernos. Pero realmente hai unha folga: a do 26 de maio; a outra non existe máis que no papel.

Fai uns días algúns sindicatos propuxemos a convocatoria de folga e tentar confluír co conflito de Caixabank, para ter máis forza. Os bancos están matándonos a cada un nunha esquina como estratexia para debilitar aos traballadores e traballadoras ante o que é proceso de reconversión sectorial.

CC.OO dixo que non aceptaban a convocatoria de folga, nin tratar de unificar a resposta a nivel sectorial. Así mesmo, negouse a facer un comunicado conxunto despois das mobilizacións, e a tratar de acordar criterios mínimos para defender na mesa. Logo, ante a decisión de convocar por parte da maioría de sindicatos, viñeron cunha proposta —non negociable pola súa parte— de meter folga o último día, cando non vale para nada.

A cuestión é clara, ante a decisión do banco de despedir e empeorar as condicións laborais, e ir a un ERE salvaxe aproveitando a pandemia como escusa, non nos queda outro remedio que defendernos. Se non vés, e logo chámante a un despacho para dicirche que asines voluntariamente, que o banco non conta contigo, arrepentiraste.