Amosando publicacións coa etiqueta carreira-profesional. Amosar todas as publicacións
Amosando publicacións coa etiqueta carreira-profesional. Amosar todas as publicacións

27 de outubro de 2023

Proceso participativo: ti traballas, ti decides!

Elabora as propostas sindicais cara a negociación do Convenio

Quen traballa todos os días es ti, o que está en xogo é como traballas e como se retribúe o teu esforzo, para iso está a negociación colectiva. Por iso, dende a CIG cremos que as propostas sindicais que defendamos na Mesa Negociadora, temos que decidilas conxuntamente.

Poñemos en marcha un proceso participativo, aberto a todo o persoal a nivel galego e anónimo (non precisamos os teus datos). Queremos coñecer cales son os problemas que te preocupan, aos que o Convenio debería dar resposta.

O convenio anterior, como era previsíbel, engordou os beneficios empresariais e recortou inxustamente os nosos salarios. Por outra parte, normas beneficiosas do convenio, coma os horarios, non se aplican. As empresas impoñen sen oposición horarios que, dende unha óptica presencialista, ordenan as Direccións Comerciais.


Podes encher en liña a devandita ou ben, se a fas en papel, a podes entregar a calquera delegada ou delegado da CIG, ou remítila á Sección Sindical da CIG por correo electrónico ou postal.
Agradecemos moitísimo a túa participación e compromiso.


16 de outubro de 2023

Constitución da Mesa Negociadora do Convenio Colectivo

A comisión negociadora do Convenio Colectivo de Banca, constituirase o vindeiro 31 de outubro. A CIG, como sindicato máis representativo a nivel galego, xa foi convocada pola patronal, AEB.

O convenio colectivo regula algúns dos nosos dereitos, nomeadamente en materia de salarios ou carreira profesional. Dicimos algúns, xa que por exemplo os horarios de convenio non se aplican, as entidades teñen os horarios que as Direccións quixeron, aceptados mansamente polo sindicalismo centralista. Un baleirado do convenio colectivo e unha guerra de horarios que prexudica aos traballadores e traballadoras.

26 de febreiro de 2021

Avaliacións 2020: + arbitrariedade + inxustiza

Despois dun ano traballando en condicións sumamente difíciles pola (presencialmente en oficinas con moito risco de contaxio, ICO's…), do saqueo da retribución variábel… Como premio, volvémonos a atopar coa subxectividade e arbitrariedade do Proceso de Avaliación Anual.

6 de xuño de 2019

O 10 xuño concentrarémonos na Coruña


Os delegados e delegadas da CIG – BBVA mobilizarémonos diante da Dirección Territorial na Coruña para protestar contra os continuos abusos e incumprimentos por parte do BBVA.

  • Reclamamos que o BBVA cumpra coa lexislación e que poña en marcha o Rexistro de Xornada.
  • Que garanta o noso dereito á desconexión dixital prevista na Lei de Protección de Datos.
  • Que a carga de traballo sexa realizable dentro da xornada laboral, abonda de obxectivos crecentes. Fronte as subas abusivas dos obxectivos cuadrimestrais que buscan non pagar a variable. Contra o pool de baixo desempeño, os semáforos, o terceiro tercil, os «bottom performers» ou os continuos seguimentos. Abonda xa de inventar sistemas para acosar ao persoal. Polo respecto a nosa profesionalidade.
  • Para que se aplique a MiFID, que até agora se nos impuxo ao persoal, pero que o banco segue sen aplicar poñendo obxectivos incluso de produtos complexos.
  • Para que se negocie un novo Plan de Igualdade. Fronte ao teito de cristal na carreira profesional. Facemos o mesmo traballo, temos as mesmas funcións e nos esixen as mesmas certificacións: pero as mulleres cobramos de media 17.166 euros menos ao ano, un 30 % menos. A discriminación ten un custe: 213 millóns de euros no 2018.

16 de abril de 2019

Convenio de Banca: TI traballas, TI decides!

Participa coa CIG na elaboración da platafroma para a negociación do convenio

Quen traballa todos os días es TI, o que está en xogo é como traballas e como se retribúe o teu esforzo, para iso está a negociación colectiva. Por iso dende a CIG cremos que as propostas sindicais, o que defendamos na Mesa Negociadora, temos que decidilas conxuntamente.

Para isto poñemos en marcha un proceso de participación, aberto a todo o persoal a nivel galego e anónimo (non precisamos os teus datos). Queremos coñecer cales son os problemas que te preocupan e que aspecto é máis importante para TI.

Non podemos esquecer que o sector está en plena reconversión que afecta ao emprego e as condicións laborais, pero tamén a como traballamos. Esa reconversión sectorial, á que hai que engadir a irrupción da intelixencia artificial, fai que sexa necesaria unha revisión profunda do Convenio na que falemos das PERSOAS.

Queremos que ti, que sofres a cotío as presións comerciais, a imposición de obxectivos desmedidos e inalcanzables, as faltas de respecto e as xornadas interminables, nos deas a túa colaboración para a elaboración da nossa plataforma.

Cubre a que te achegamos e entrégalle a calquera delegado/a da CIG ou envíaa por correo electrónico. E se hai algún aspecto ou cuestión non contemplado na mesma que consideres de interese, indícao cando a cubras.

Ligazón relacionada:
Formulario enquisa (en liña): http://ir.gl/enquisa

19 de febreiro de 2019

8 de marzo de 2019: Mulleres en Folga

Na histórica xornada do 8 de marzo do pasado ano, miles de galegas ateigamos as prazas e vilas do país participando no internacional de mulleres, conseguindo pór no foco do debate social a problemática dos coidados e a discriminación que sufrimos as mulleres tanto nos lugares de traballo como fóra destes. Un ano despois, cómpre impulsarmos na Galiza un novo día de loita, para que dunha vez por todas o poder entenda que as mulleres estamos fartas da desigualdade e das agresións que sufrimos e porque non imos permitir que nos fagan retroceder nos nosos dereitos, cando aínda nos quedan moitos por conquistar.

A precariedade segue a ser a definición da tipoloxía do emprego das galegas. Seguimos a sufrir fenda salarial, traballando en categorías inferiores, con peores retribucións polo mero feito de sermos mulleres. Continuamos afastadas dos grupos de poder e de toma de decisións por mor dun chan pegañento que nos impide promocionar. Seguimos aturando acoso e agresións sexuais a pesar da existencia de protocolos nas empresas. Aínda somos despedidas a causa da nosa maternidade. Continuamos realizando duplas e triplas xornadas e con escasos dereitos laborais que faciliten a conciliación, obrigándonos na práctica a reducir horarios e ingresos.

16 de marzo de 2018

Intervención da CIG 
Xunta xeral de accionistas 2018

Neste 16 de marzo, membros da Sección Sindical da CIG no BBVA acudiremos de novo a Bilbao para achegar o noso discurso na Xunta de Accionistas. Amosaremos a realidade do banco en Galiza nese foro onde, cando menos nesta data, o Presidente e o resto de integrantes do Consello de Administración non poden evitar escoitar o verdadeiro retrato do que son as condicións de traballo reais nesta empresa.

A compañeira Carmen García fará lectura do discurso que vos achegamos e no que trasladaremos a Francisco González do que estimamos é o seu legado, nestes longos anos da súa Presidencia.

A negativa evolución da acción versus o aumento inmoral e inxustificado das súas retribucións. Até un máximo de 125 millóns de euros vanse reservar para un colectivo de 238 persoas privilexiadas.

A situación laboral no banco, cunha política permanente de destrución de emprego e peche de oficinas. Con despedimentos por unha falsa «baixa produtividade», todos recoñecidos improcedentes, e o medo como bandeira na xestión RR.HH.

Salientaremos a presión comercial na Territorial Noroeste, insoportable e interesada, onde a obsesión polo Ranking só obedece a obxectivos particulares, mantendo a rede comercial nun particular torneo en todos contra todos que fixo do pasado exercicio e do comezo deste, os peores tempos que lembramos en termos de clima laboral nesta Territorial.

Do constante desprezo a un cadro de persoal que fai moi ben o seu traballo e que ano tras ano, segue a cumprir. Pero como recompensa aos seus esforzos, este ano o único que recibe son labazadas. Unha pola formación MiFID e outra pola «compensación» do bonus. Levamos estes asuntos, a instancias da CIG, coma non pode ser doutro xeito, perante os Xulgados.

Para cando a negociación do horario do colectivo BBVA Contigo?

Reclamaremos cambios reais no eido da Conciliación e Igualdade, cambios polos que a sociedade berrou alto e forte nas rúas galegas este histórico 8 de Marzo.

Desde esta Sección Sindical queremos agradecervos as vosas delegacións de votos que fan posíbel de novo a nosa presenza nesta Xunta. Presenza que, queremos aclarar, sempre foi sufragada con medios propios. Non estendemos este agradecemento a Relacións Laborais do Banco, que facendo un uso discriminatorio dos recursos da entidade, segue a facilitar a presenza en Bilbao a unhas organizacións sindicais e a outras, non.


De seguido, tedes a intervención lida pola nosa compañeira Carmen.
 

17 de marzo de 2017

Xunta xeral de accionistas 2017

Hoxe celebrouse a do banco. Como cada ano, a CIG acudiu para facer chegar as reivindicacións do cadro de persoal. Como cada ano, Francisco González, fixo caso omiso ás nosas verbas. En xeral, todos os sindicatos presentes na Xunta incidimos nos despedimentos, a destrución de emprego e as presións ás que nos someten a cotío, e aínda máis cando se trata de que aceptemos baixas «voluntarias».


X. Miguel Fernández e Carmen García, representantes da CIG
   X. Miguel Fernández e Carmen García, representantes da CIG
    Imaxe: CIG / BBVA  (cc) BY-NC-SA
 

Repartiron os seus dividendos (gañados a costa do esforzo do persoal) e o presidente seguiu enredado co discurso do «banco tecnolóxico» ao igual que nos anos pasados. Considera que os despedimentos efectuados son «casos puntuais» e aínda nos augura un futuro moi duro para todos e todas no que, segundo el, tomarán medidas para garantir emprego para a maioría do persoal. Como dixemos ao final do noso discurso, se seguen por este camiño, a nosa resposta será sempre a denuncia e a mobilización.


Esta foi a intervención da representante da CIG:

6 de xullo de 2015

Vivindo nun virtual mundo feliz…

Nova reunión da mesa negociadora e… será polo efecto do calor, ou da proximidade do período de vacacións, pero a patronal insiste en convencernos de que traballamos nun mundo onde todo é perfecto e non hai nada que mellorar. Os e as bancarias queixámonos de puro vicio: a xornada laboral e os horarios son os acaídos, os bancos fomentan a conciliación da vida laboral e persoal, e as mulleres benefícianse de magníficos plans de igualdade que fomentan a súa carreira profesional e o acceso a postos de dirección.

3 de xullo de 2015

Convocatoria Ascensos por Capacitación 2015

Un ano máis, foi comunicada a convocatoria dos exames de ascenso a Niveis VIII, IX e X. Nesta ocasión, unicamente existen 48 prazas para o nivel de Técnico e non hai prazas vacantes para o ascenso aos niveis IX e X do grupo profesional Administrativo. A norma coa información completa é a GR.15.002, onde dispoñedes do enlace para facer a inscrición na proba.

A data do exame está prevista para o mes de novembro deste ano nun lugar e data concreta por determinar. Agardamos que nesta ocasión se produza en día hábil, evitando que os compañeiros e compañeiras que opositen teñan que destinar máis do seu tempo de lecer do absolutamente imprescindible. Lembremos que moitos e moitas se desprazan dende ben lonxe e, se é o caso, teñen que facer noite na Coruña.

1 de xuño de 2015

Proposta da AEB: máis obxectivos, maior carga e ritmos de traballo e xornadas laborais sen fin

Na reunión do 28 de maio abordouse todo o relacionado coa carreira profesional; cada sindicato presentou as súas propostas (algunhas copiadas das presentadas con anterioridade pola CIG). A patronal dedicouse a dicir non e a pretender unha maior mobilidade funcional, o que enlaza con outras medidas de flexibilidade (flexibilidade horaria, etc).

O acordo estatal entre patronais e sindicatos centralistas, o AENC—2015, non só recolle a contención salarial como norma, tamén un compromiso para implantar unha maior flexibilidade interna (en mobilidade funcional e xeográfica, horarios, etc.).
AEB reclama que no Convenio se pacten as medidas acordadas no AENC—2015. A CIG non ten esas ataduras.

28 de maio de 2015

Os perigos da tea de araña

O 5 de xuño é a data na que remata a recollida de datos para o novo proceso de valoración de competencias, agora coñecido como «SKILLS 2015», no que se verá inmerso todo o persoal cun mínimo de 6 meses de antigüidade. Ten como destino concretar a primeira fase do modelo de desenvolvemento profesional.

O modelo, segundo a empresa, ten 3 pasos: o coñecemento como primeira fase do autodesenvolvemento;
Plan de mellora, unha vez coñecidas as habilidades e os estilos de liderado a incidir, coa axuda dos recursos de formación de Campus BBVA;
Apúntate+ como ferramenta de cara ao desenvolvemento profesional.

9 de febreiro de 2015

Coa forza do teu voto

Coa forza do teu voto nós seremos a túa voz na defensa do posto de traballo fronte a novas fusións, regulacións e peche de oficinas. Para rematar coa práctica dos horarios abusivos. Conquistar salarios e beneficios que fagan xustiza ao que se fai. Promoción de carreira e traslados con obxectividade e transparencia. A plena igualdade real.

CIG / BBVA, a voz sindical de proximidade

Sabido é que na CIG, pola nosa condición exclusivamente galega, contamos co noso centro de decisión aquí, ao carón de todas e todos vós. Non temos liberados/as polo BBVA, nin gozamos de recursos de empresa que condicionen ou limiten o noso compromiso irrenunciable á defensa do interese das compañeiras e compañeiros que o precisen. Amparados legalmente pola nosa condición de «sindicato máis representativo», a nosa participación nas negociacións sectoriais ou de empresa, supoñen a oportunidade de trasladar a problemática directa e próxima que poida afectar a cada un/unha de vós, sen deixar de abordar os grandes retos laborais da totalidade do colectivo.

22 de xaneiro de 2015

Unha voz sindical próxima: Fontán

Fontán / Pontevedra
A presión para alcanzar obxectivos desproporcionados remata pasándolle grave factura á saúde

Fontán / Pontevedra

Existe presión inaceptable na realidade laboral do banco?

Si, por máis que se pretenda enmascarar. A sobrecarga de traballo, os horarios sen límite, a procura de obxectivos desproporcionados e a obsesión por unha retribución variable incerta, son causa que levan ao queime persoal. Matan talento, truncan carreiras profesionais e rematan pasando grave factura á saúde. Se permitimos acomodarnos á tensión diaria, é común atoparse con síntomas como ansiedade, inquietude, nerviosismo, temor ou angustia. O perigo está en que é case imposible darse conta do problema. Anticipo de enfermidade cardiovascular, gástrica ou psicolóxica. É necesario saltar a tempo dunha trampa que é fatal, o estrés.
No sindicato asumimos o reto de dar a batalla contra esa situación que é o pan de cada día na verdadeira realidade laboral do banco.

Como se ve na avaliación de riscos?

O Plan de Riscos Laborais ten unha carencia indiscutible, a de tipo psicosocial. No CESS, a CIG busca que se aborde con seriedade e rigor este factor polo que afecta á casuística do traballo nas oficinas. BBVA, enreda cun estudo da UCM feito a medida para que o contratante poida aparentar.

20 de xaneiro de 2015

Unha voz sindical próxima: Carmen

Carmen / A Coruña
A prolongación abusiva da xornada de traballo impide conciliar a vida laboral coa persoal e familiar

Carmen / A Coruña

BBVA, facilita a conciliación de vida laboral e persoal?

Non, en absoluto. A práctica abusiva de forzar a prolongación da xornada impide a conciliación real da vida laboral coa persoal e familiar. É, con seguridade, un dos problema máis importante que soportamos as mulleres e homes que traballamos para esta entidade. Queixa reiterada nas enquisas sobre clima laboral.
As empresas son as persoas que traballan nela. Precisamos de medidas humanizadoras do ámbito laboral. Profesionais satisfeitos de traballar no banco que serán persoas motivadas e comprometidas coa entidade. E iso remata por traducirse en máis rendemento na conta de resultados, na calidade e na procura da excelencia como meta.
O obxectivo de acadar que BBVA sexa un «Banco 10» debe comezar pola satisfacción do seu persoal.

Cal é resultado do Plan de Igualdade?

Nulo. Non pasa de documento feito para quedar ben. Pura pose e imaxe de falsa integración. Para nós, a CIG, arbitrariamente excluídos na súa elaboración, é o «plan de dá igual». Remata agora a súa vixencia. Agardamos que o próximo sexa froito dun proceso que escoite a todas as voces.

14 de novembro de 2014

Catalogacións

O 21 de novembro remata un proceso fundamental para todo o cadro de persoal polas súas consecuencias, tanto salariais como (e máis importante) laborais, porque pasará a formar parte do expediente laboral de todos e todas nós.

  • Trátase «dunha valoración global que o/a responsable realiza dos seus/súas colaboradores/as na súa función actual e unha ferramenta de apoio na xestión de cadros de persoal».
  • É UNHA VALORACIÓN SUBXECTIVA, xa que a obxectividade do/a responsable directo pode ser controlada polo seu xefe/a, quen pode acceder ás catalogacións realizadas e, unha vez finalizado o proceso, PÓDESE MODIFICAR.
  • Pode ser usada como diferenciación do mérito pero tamén como presión ou represalia, xa que non se libera ata que se libera a avaliación, e non ten ningún criterio obxectivo no que basearse.
  • Este proceso inflúe na nosa revisión salarial.
  • Consiste en que o/a noso/a responsable poña unha marca nunha categoría de seis, que van de INADECUADO a MOI DESTACADO, que pasa a formar parte do noso expediente persoal.
  • A catalogación INADECUADO ou REGULAR supón que estás «desaxustado/a» na túa función polo que:

29 de setembro de 2014

O momento da verdade é chegado
(Enquisa de insatisfacción)

Nestes días imos ter a oportunidade de cumprimentar a «Enquisa de satisfacción de empregado 2014» que persegue, segundo a empresa, que o BBVA siga sendo «o mellor lugar para traballar», e dende a CIG querémosvos pedir que a fagades. Pero non como nos están a pedir dende algúns ámbitos, senón coa verdade, de cara, con rigor… é o único xeito de facela. Non permitades que as vosas respostas sexan mornas, ou que ao non cubrila deixedes esta oportunidade de que a realidade brille no resultado. É responsabilidade de todos e todas que os problemas, que os hai e os coñecemos de sobra, saian á luz sen trabas.

Enquisa de (in)satisfacción

16 de xuño de 2014

Convocatoria Ascensos por Capacitación 2014

Como cada ano, BBVA convoca os ascensos por capacitación, polo que vos achegamos un resumo que esperamos sexa de utilidade. Lembrade que o prazo de inscrición remata o 30 de xuño.

Podedes atopar o regulamento no e-spacio, en Normativa, buscando polo número de comunicación:
NIVEL VIII: GR.13.006
NIVEIS IX e X: GR.13.005
A presentación de solicitudes de admisión farase por correo electrónico á dirección

concurso - oposicion @ bbva . com

seguindo as instrucións que vos relatamos deseguido:

12 de febreiro de 2014

Non te conformes…

NON TE CONFORMES… NON TE CONFORMES… NON TE CONFORMES… NON TE CONFORMES…


Non asines a conformidade dunha avaliación feita cun sistema inxusto. Esta é a ruta para dar o NON CONFORME a túa avaliación:

Intranet > Recursos Humanos > Para ti dRRHH (ESP) > Procesos de RRHH > PROCESOS DE GESTIÓN > Fijación de Objetivos/Evaluación > Evaluación de Objetivos 2013 > Mis Evaluaciones

Temos só uns días para dar a nosa conformidade ou non, no aplicativo.