CIG BBVA: ERE «modelo Santander» Iníciase o período de consultas, pero o banco non facilita a listaxe de persoas afectadas

ERE—BBVA · Período de consultas

Hoxe, 6 de maio, comezou o «período de consultas» previsto no Estatuto dos Traballadores/as, que terá como prazo máximo 1 mes. Nesta primeira reunión a empresa estaba obrigada a facilitar a documental prevista na lexislación, incluído o listado das persoas afectadas polas extincións propostas.

O banco está asesorado polo despacho Sagardoy, negociador doutros ERE’s no sector (dende que foi contratado a dedo polo Goberno Rajoy, para a agresiva reestruturación das Caixas de Aforros). Sagardoy foi quen redactou a Reforma Laboral do PP, o BBVA quere ir sobre seguro.

Seguindo as indicacións de Sagardoy o BBVA utilizou un subterfuxio legal para non facilitar a listaxe das persoas a despedir: dicir que o procedemento será voluntario (reservándose o banco quen pode saír) e que se non se cubre con «voluntarios/as» serán despedimentos en base ás valoracións.

Todos e todas sabedes como están utilizando o resto dos bancos a «voluntariedade», nomeadamente no ERE do Santander, acosando dun xeito salvaxe e institucionalizado ao persoal que previamente seleccionou o banco, até que consigue que «solicite» a saída voluntaria. Xa coñecemos o modelo ERE—Santander, e a CIG non o quixo alí, nin o quere para o persoal do BBVA.

En canto ás condicións propostas, son tan miserables que a voluntariedade non existiría, ademais de que o banco se reserva a aceptación (non sabemos con que criterios), nin cantas prexubilacións está disposto a negociar.

En canto ao persoal de 55 anos, o banco non fixo ningunha mención do pago do Convenio Especial.

En relación ao persoal menor de 56 e, a xeito de exemplo, a quen leve 10 anos no banco, daríanlle 70 días de salario por riba do mínimo legal (20 días por ano, máximo 12 mensualidades).

Se aínda non tiñades a convicción, máis motivos para facelo. Hai que paralos.

Digámoslle alto e claro NON AO ERE!