CIG BBVA: O Banco non recúa. Nós seguiremos na rúa!

ERE—BBVA · Período de consultas

O persoal defende o seu posto de traballo 24 horas ao día, 7 días á semana e 365 días ao ano. No centro de traballo, cando nos chaman a calquera hora ao móbil persoal ou cando nos atopamos cunha clienta no súper, pola rúa, na praia ou no ximnasio. Do mesmo xeito, o pasado día 10 defendémolo coa mesma forza, convición e dedicación, na rúa. Por iso a Dirección, que sabe como traballamos cando nos poñemos, está preocupada e tentou amortecer a reunión de hoxe.

Os sindicatos chegabamos á Mesa Negociadora coa forza do voso empuxe e o banco sabíao; optou por meter aos «técnicos» de Equipo Económico a ler durante horas o informe que nos facilitaron a semana pasada. Coma se os/as sindicalistas e os Gabinetes Económicos e Xurídicos dos sindicatos non soubésemos ler.

Xa na última parte da reunión, despois de horas de matar a negociación, fomos claros: o banco debe retirar o ERE, poñer en marcha un plan de prexubilacións e buscar vías alternativas de redución de custes sen afectar ao deber de prestar servizo e de garantir os postos de traballo. E se alguén non sabe, non é capaz, ou vese inútil a hora de rendibilizar todo o noso traballo, o esforzo do cadro de persoal que cumpre máis ala do deber, a culpa non é nosa, é desa persoa: que colla a porta e marche.

Na CIG apostamos dende o primeiro día por unha Unidade de Acción para defender os postos de traballo. Cremos que a participación masiva do cadro de persoal nas mobilizacións do día 10 puxo á Dirección moi nerviosa; é ela a que está obrigada a mover ficha na negociación, propoñendo alternativas de recorte de gastos, sen tocar o emprego e sen despedimentos de ningún tipo. Doutro xeito, acabará por conseguir despedir a quen quere e empeorar as condicións das persoas que queden.

Por iso, somos da opinión de seguir mantendo a Unidade de Acción, cun calendario de mobilizacións e a convocatoria dunha FOLGA, medidas de presión para forzar á Dirección a negociar, cousa que, a día de hoxe, segue sen facer.