Desexámosvos un Bo 2024

Estes, entre outros, son os nosos obxectivos. Se non veñen co novo ano, iremos por eles, porque sabemos que a loita é o único camiño!

A folga en Abanca é a nosa folga

As traballadoras e traballadores de ABANCA irán á folga o próximo 11 de xaneiro, nunha convocatoria da CIG e ASCA. A súa loita é a nosa e os bancos da AEB deberían tomar nota na negociación do Convenio.

As reivindicacións da folga en Abanca buscan dar resposta a unha problemática que é específica dese banco, pero que en moitos aspectos é común ao que sufrimos no resto dos bancos.

AEB: «Non hai perda de poder adquisitivo»

Vivimos en realidades paralelas. A patronal considera que non hai perda de poder adquisitivo, e pon o contador a cero desde o 1 de xaneiro de 2024.

Na última xuntanza, o pasado 14 de decembro, a patronal AEB fixo unha proposta de convenio que non contempla a recuperación do poder adquisitivo perdido nos últimos anos e afonda na perda de dereitos e salarios a futuro.

SALARIOS: 7 % de incremento salarial a repartir en catro anos, sen cláusula de garantía salarial referenciada o IPC, e aplicando a de compensación e absorción. A suba que propoñen é un 2,25 % para os anos 2024 e 2025, e un 1,25 % para os anos 2026 e 2027.

MOBILIDADE XEOGRÁFICA: ampliar de 25 a 50 km. O incremento da mobilidade facilita aos bancos unha ferramenta de presión e castigo, ao tempo que incide negativamente no salario do persoal, xa que os custes desa mobilidade son asumidos polos traballadores e traballadoras.

ANTIGÜIDADE: Consideran que é un concepto salarial obsoleto que hai que suprimir. No caso de aceptar a súa eliminación, revisarían a súa proposta de suba salarial, que en ningún caso contemplaría a cláusula de garantía salarial nin a eliminación da compensación/absorción.

A CIG consolida o dereito á redución horaria nos días de Nadal no BBVA: o Supremo rexeita o recurso do banco

Como sabedes, despois da implantación do sistema de rexistro de xornada, o banco comunicounos que o horario nos días de Nadal (24 e 31 de decembro e 5 de xaneiro) sería o habitual sen redución da xornada. A CIG demandou daquela diante do TSXG pola modificación sustancial e colectiva das condicións de traballo, xa que como quedou acreditado levábase adiantando a saída eses días no banco por máis de 20 anos.
A sentenza foi favorábel a todas e todos nós e recuperamos ese dereito.

   Vídeo: YouTube  [.mp4] 746 Mb

Aínda non conforme, o banco recurriu esa sentenza do TSXG ao Supremo pretendendo volvernos a eliminar o dereito. Mais onte fóisenos notificada sentenza do Supremo que resolve ese recurso do BBVA contra a sentenza do TSXG, rexeitándoo e confirmando a sentenza do TSXG. Quedando, polo tanto, agora si ese dereito consolidado.