CIG BBVA: Galiza padece a maior concentración bancaria da UE, pero a Xunta négase a actuar

Debate no Parlamento Galego do 24 de xaneiro

O pasado 24 de xaneiro, a situación do sector financeiro e como nos afecta laboralmente, foi debatida de novo no Parlamento Galego e, unha vez máis, a Xunta de Galicia situouse do lado da patronal bancaria. Non fará un novo estudo sobre a concentración bancaria e non tomarán medidas.

Imaxe dunha das numerosas protestas da CIG contra a destrución de emprego.

Cando falamos de fusións bancarias, moitas persoas pensan en prexubilacións, pero o proceso vai máis alá.

Ten un impacto laboral: o persoal que queda asume unha maior carga de traballo, empeóranse as condicións laborais e se reducen e deslocalizan postos de traballo.
Ao mesmo tempo substitúese persoal indefinido con dereitos por persoal con contratos temporais en precario, con salarios de miseria.

A concentración ten tamén un impacto social e económico: é un proceso de acumulación do poder económico con ramificacións no poder político, xudicial e nos medios de comunicación; redúcese o servizo bancario, tanto polo novo modelo de banca, como polo peche de oficinas; redúcese o número de competidores; afecta ao emprego; e os beneficios xerados aquí marchan do país.

Galiza ten unha concentración que supera os límites previstos na UE, segundo informes encargados pola propia Xunta. Pero non tomaron medidas e, dende aquela, tivo lugar a absorción do Grupo Popular por parte do Santander, e á adxudicación da Caixa Geral a Abanca.

A CIG, que vén denunciando esta reconversión do sector, a instancias do BNG mantivo recentemente unha reunión coas deputadas Noa Presas e Montse Prado, que presentaron unha iniciativa no Parlamento Galego, sobre a necesidade dun novo estudo que foi debatida o pasado 24 de xaneiro.

A Xunta de Galicia considerou que non é necesario un novo informe nin tomar medidas, malia que o que xa teñen, alertaba dun grao de concentración máis alá da que en economía se considera razoable.
Unha posición que se repite en cada debate, como cando se debateu sobre o impacto laboral da MiFID (a Xunta apoiou aos bancos cando denunciamos a fraude), ou cando se debateu sobre as políticas comerciais bancarias.

Para a CIG o persoal dos bancos debe coñecer a posición real da Xunta de Galicia ante o impacto dos procesos de fusión; cando se denuncia a presión comercial, ou o impacto laboral da MiFID, «a Xunta sempre se sitúa ao lado das Direccións dos bancos».