CIG BBVA: Propostas da CIG - XXII Convenio Colectivo da Banca

Onte día 27 de abril, presentamos na Mesa Negociadora do Convenio Colectivo da Banca en Madrid, a Plataforma coas nosas reivindicacións para mellorar a defensa dos dereitos de todo o persoal do sector, a recoller no XXII Convenio de Banca.

Estamos a facer un traballo exhaustivo xa que o texto do Convenio precisa dun profundo repaso, tanto de estrutura como para a súa adecuación ás reformas legais producidas nos últimos anos sobre temas de tanto calado como Saúde, Igualdade e Conciliación.

A seguir amosámosvos a liñas mestras da nosa proposta, que iremos desenvolvendo ao longo da negociación e dándovos cumprida información do proceso e das nosas peticións en maior profundidade.

Asemade convidámosvos a todos e todas a que contactedes con nós para achegarnos as vosas propostas sobre o tema.

VIXENCIA

Dous anos.

SALARIOS

Recuperación de poder adquisitivo. Xa que a banca segue a obter beneficios e levamos anos perdendo poder adquisitivo cando os beneficios eran moito maiores, propoñemos fórmulas para a recuperación do mesmo, con subas anuais do IPC + 3 puntos durante a súa vixencia e ademais unha paga extra.
Salarios variables pactados. Para loitar coa competencia que estas retribucións fan coas do convenio, propoñemos establecer fórmulas para que sexan recoñecidas como salario pensionable a todos os efectos.
Premio de permanencia no banco. Pedimos unha gratificación económica e días hábiles de libranza ao acadar determinada antigüidade.

PARTICIPACIÓN EN BENEFICIOS

Suprimir o tope máximo dos 15 cuartos de paga que fixa o vixente Convenio.

XORNADA E TEMPO DE LIBRANZA

Xornada laboral:
- 35 horas en cómputo semanal de luns a venres, libranza de sábados. Horario: 8 a 15 horas.
- Control efectivo do horario, para respectar a conciliación e non exceder deseguido o tempo de traballo da xornada legal, mediante fichado con reloxo.
- Negociación cos comités de empresa dos horarios especiais recollidos no artigo 25.4.XXI Convenio Colectivo de Banca, artigo 25.4 : As Empresas poderán establecer horarios, continuados ou non, distintos para o persoal directivo e auxiliar do mesmo (incluidos os Chóferes) no mínimo que precise, e para o persoal de producción (Xestores e Visitadores), así como adecuar o horario de servizo ao público e, por tanto, o do mínimo de persoal indispensable para prestalo, ao que teñan outras entidades ou establecementos non bancarios de análoga función. Subsistirá o sistema de turnos aplicable aos servizos mecanizados.
- Regulamento do horario de traballo efectivo e atención ao público na Semana de Festa Maior.
Vacacións:
- Incremento das vacacións a 27 días hábiles sen computar sábados, domingos nin festivos.
- Permitir que todo o ano sexa período hábil para o disfrute das vacacións.
- Realización dun único cadro por departamento ou oficina sen separar persoal administrativo e técnico.
Licenzas: Supresión do límite de 15 días de licenza como tope anual, e ampliación de 4 a 6 os días de libre disposición retribuídos.

MOBILIDADE XEOGRÁFICA

Eliminación en Galiza dos desprazamentos ata os 25 km.

Equipos de substitucións e persoal que realiza o seu labor en máis de un centro de traballo físico: É preciso acadar compensacións en tempo de lecer, económicas, de transporte e comida, así como a contratación de seguros para as persoas (accidente e vida), e para os vehículos propiedade dos traballadores ou traballadoras que se estean usando para ditos desprazamentos de traballo.

EMPREGO

Contratación. Indefinida, cun período de proba de 3 meses.
Utilización de ETTs. O persoal que durante os últimos anos fora contratado por medio desta modalidade, formará parte dunha bolsa para a súa incorporación ao cadro de persoal das empresas.
Integración de traballadores e traballadoras con discapacidade. Integración inmediata do 5 % de persoas con estas características.

IGUALDADE DE OPORTUNIDADES, CONCILIACIÓN E PROTECCIÓN Á MATERNIDADE

Actualización do articulado do Convenio ás disposicións legais vixentes na materia e inclusión de melloras en cadanseu propio capítulo.
Compromiso de redacción e posta en vigor de Plan de Igualdade en cada empresa no prazo máximo de ano e medio.

CLASIFICACIÓN E CARREIRA PROFESIONAIS

Persoal administrativo. Unificación no nivel IX.
Persoal técnico. Definir o nivel mínimo para ocupar cada posto, fixando como categoría mínima para director/a de oficina ou equivalente dentro da estrutura da empresa o nivel V.
Ascensos.
- Por antigüidade. Aos 20 anos de servizo efectivo acadarase o nivel VIII.
- Por capacitación. Acceso por capacitación tamén ao nivel VII.
Formación. Sempre dentro da xornada laboral.

PREVENCIÓN E SAÚDE LABORAL

Creación dun capítulo específico sobre «Prevención, Seguridade e Saúde no Traballo» para tratar entre outros temas: PVD, CESS, vixilancia da saúde, revisións médicas, avaliación de riscos ou formación e información na prevención.
Melloras en diversos temas, como postos PVD ou a prevención do atraco considerado como risco laboral.

PREVISIÓN SOCIAL

Substituír as referencias aos 65 anos de idade por «ou a idade en que por Lei poda acceder á xubilación sen penalización».
Exteriorización dos fondos de pensións nas empresas nas que non o estean xa.
Creación de un complemento de xubilación para os traballadores e traballadoras posteriores ao 8 de marzo de 1980.

COMISIÓNS INTERNAS A NIVEL DE EMPRESA

Creación dunha Comisión pola Normalización Lingüística. Preferencia para cobertura de vacantes en Galiza, para traballadores/as con coñecemento do galego falado e escrito. Realización de cursos de idioma galego dentro do Plan de Formación Profesional. Dentro dos cursos de Formación, un 50 % serán impartidos en galego.

A vindeira reunión será o día 11 de maio. Seguiremos informándovos de todas as incidencias durante esta negociación.

➤ Temos unha canle en Telegram, che convidamos a seguirnos por se queres estar ao tanto das novas tan axiña se produzan; Únete!