CIG BBVA: Mobilizacións 25N contra a violencia machista

Durante o ano 2014 foron 7 as mulleres galegas asasinadas a mans das súas parellas e exparellas. Por elas, durante todo o mes de novembro nos locais sindicais da CIG das 7 cabeceiras de comarca colocamos 7 siluetas dun metro sesenta de altura, identificadas co seu nome e o nome de quen as asasinou, en lembranza e homenaxe ás 7 vítimas do machismo. Porque entendemos que é preciso identificar comportamentos, actitudes e ideas discriminatorias, que forman parte da cultura da violencia contra as mulleres, e, ao tempo, visibilizar publicamente este feminicidio.

Erradiquemos a Cultura da Violencia Machista

Por iso desde a CIG facemos un chamamento a participar nos actos convocados polo movemento feminista na tarde do día 25, e nas mobilizacións de delegadas e delegados da nosa central sindical que terán lugar nas sete comarcas, os días 24 e 25 de novembro, en repulsa á violencia machista:

Concentracións nas seguintes cidades:

_Datas

Vigo: ás 19 horas do día 24 de novembro, no Marco, coincidindo co peche do curso de Empoderamento.
A Coruña: ás 12 horas do día 25 novembro, diante da Confederación de Empresari@s, en Monelos.

Compostela: ás 12 horas do día 25, diante do Gadis da rúa Nova de Abaixo (ao carón da praza de Vigo), en resposta ao acoso laboral contra unha traballadora logo de exercer o seu dereito á reducir á súa xornada de traballo por garda legal dun fillo con diversidade funcional.
Ferrol: 12 horas do día 25, diante do edificio Administrativo da Xunta de Galiza.
Lugo: ás 11:30 horas do día 25, diante do edificio Administrativo da Xunta, na Ronda da Muralla
Ourense: ás 12 horas do día 25, diante do local sindical.
Pontevedra: ás 12 horas do día 25, na praza 8 de Marzo.