CIG BBVA: Mal CLIMA: Prognóstico de fin de verán

Como era de esperar, a xente que quedou traballando en agosto está derreada e a que volta de vacacións desganada, ao ver que a maquinaria do CLIMA e o PEIT non se detén...

Pero iso si, na liña de transparencia habitual, a información oficial é inexistente, e os prognósticos e rumores non deixan de aparecer:

- A implantación do proxecto en BEC é, ao parecer, inminente, e como sempre, xa que lles funciona, tentarán comunicar as cousas a última hora e sen posibilidade de discusión ao colectivo afectado.

- Asemade, xa sabedes que a renovación das contratacións temporais xa non é segura; de feito, houbo varias persoas ás que non se lles renovou, e outras para as que a súa continuidade dependía do seu traslado a Madrid.

- De todos os xeitos, xente debe haber de sobras, xa que nunca tanta cobertura temporal de persoal se denegou, ¿ou é que xa temos tantos ETTs e contratacións eventuais permanentes nas caixas que BBVA non pode asumir máis sen chamar a atención?

-Outro tema incrible no seu desenvolvemento, foi o peche de oficinas en agosto, con cartóns de firmas metidos en caixas de folios amoreadas pola oficina, imposibilidade de traballar cumprindo a normativa, e con reclamacións constantes da clientela.

-A auditoría, pola súa banda, segue a facer expedientes poñendo moito interese en aspectos nos que a permisividade fixo costume durante anos... vivir para ver.

En fin... que co ambiente enrarecido polos comentarios a media voz, que poden oír algunhas persoas si e outras non, o prognóstico é malo con tendencia a empeorar.

Como sempre, dende a CIG tentaremos facerlle fronte, pero entrementres, e como medidas de protección contra as posibles “tormentas” de fin de verán, velaí algún consello:

Normativa: Hoxe en día, a nosa mellor defensa do posto de traballo é o cumprimento estrito da normativa, incluso máis que a produtividade que, como xa sabemos, manipulan a vontade.
Documentación: Ante anuncio de traslado ou cambio de función, gañade tempo, solicitádeo por escrito.
Distancia: De saída, podédevos negar a un traslado a máis de 25 km.
Negociación: Se vos ofertan algo, pensade se vos interesa ou non, e negociade as condicións ANTES de aceptar. E claro, POR ESCRITO.
Representación Sindical: Estamos aquí para vos axudar. Ante calquera dúbida ou problema, recorrede a nós. Tedes dereito a que a representación sindical estea presente canda vós nas conversas coa empresa.